شاه داغيم ،
چال پاپاغيم ،
ائل داياغيم ،
شانلي سهنديم،
باشي طوفانلي سهنديم ،
باشدا حيدر باباتک قارلا- قيروولا قاريشيب سان،
سون ايپک تئللي بولودلارلا اوفوقده ساريشيب سان،
ساواشارکن باريشيبسان،
گويدن ايلهام آلالي سيري سماواته دئيه رسن،
هله آغ کورکو بورون ،يازدا ياشيل دوندا گييه رسن،
قورادان حالوا ييه رسن!
دوشلرينده سونالار سينه سي تک شوخ ممه لرده،
نه شيرين چشمه لرين وار!
او ياشيل تئللري يئل هورمه ده آينالي سحرده،
عشوه لي ائشمه لرين وار،
قوي ياغيش ياغسادا ياغسين،
سئل اولوب آخسادا آخسين،
يانلاريندا دره لر وار!
قوي قلمقاشلارين اوچسون فره لرله، هامي باخسين،
باشلاريندا هئره لر وار،
سيلديريملار، سره لر وار،
او اتکلرده نه قيزلار ياناغي لاله لرين وار!
قوزولار اوتلاياراق نئي ده نه
خوش ناله لرين وار!
آي کيمي هاله لرين وار!
گول - چيچکده بزه ننده ،نه گلينلر کيمي نازين!
يئل اسنده او سولاردا نه درين راز- نيازين!
اوينايار گوللو قوتازين...!
نچون آه
ائلدین ای بلبل نالان هریسیم
یادووا دوشدی مگرحال پریشان هریسیم
خس وخاشاک باسیب گلشنی گللر سارالیب
نیه بو حاله قالیب بس بو گلستان هریسیم
نه یاتیبسان آییل ای ملت بیچاره آییل !
ساتیر
آخر وطنی دشمنه اعیان هریسیم
در و دیوارینی قان ایلیوب الوان ای داد
نه غم انگیزدی یارب بوشبستان هریسیم
بالش نازه قویوب باشوی ناز ایلمه دور
سورونی قورت داغیدار یوخلاسا چوپان هریسیم
اوزگلرصاحب اولوب بی سرو پا ملتینه
نیه یارب بیله خوار اولدی عزیزان هریسیم
وطنیز جسمدی ، سیزده وطنه جان کیمیسیز
راضی اولمون قالا جانسیز وطن ای جان هریسیم
حق سئل کیمی دریایه آخیب یول تاپا جاقدیر
داش
آتماغینان کیمسه اونو چوندره بیلمز
عالمده
قارانلیقلار اگر بیرلشه باهم
بیر
خیر داجا شمعین ایشیقین سوندوره بیلمز