شاه داغيم ،
چال پاپاغيم ،
ائل داياغيم ،
شانلي سهنديم،
باشي طوفانلي سهنديم ،
باشدا حيدر باباتک قارلا- قيروولا قاريشيب سان،
سون ايپک تئللي بولودلارلا اوفوقده ساريشيب سان،
ساواشارکن باريشيبسان،
گويدن ايلهام آلالي سيري سماواته دئيه رسن،
هله آغ کورکو بورون ،يازدا ياشيل دوندا گييه رسن،
قورادان حالوا ييه رسن!
دوشلرينده سونالار سينه سي تک شوخ ممه لرده،
نه شيرين چشمه لرين وار!
او ياشيل تئللري يئل هورمه ده آينالي سحرده،
عشوه لي ائشمه لرين وار،
قوي ياغيش ياغسادا ياغسين،
سئل اولوب آخسادا آخسين،
يانلاريندا دره لر وار!
قوي قلمقاشلارين اوچسون فره لرله، هامي باخسين،
باشلاريندا هئره لر وار،
سيلديريملار، سره لر وار،
او اتکلرده نه قيزلار ياناغي لاله لرين وار!
قوزولار اوتلاياراق نئي ده نه
خوش ناله لرين وار!
آي کيمي هاله لرين وار!
گول - چيچکده بزه ننده ،نه گلينلر کيمي نازين!
يئل اسنده او سولاردا نه درين راز- نيازين!
اوينايار گوللو قوتازين...!
کونلوم قوشو قاناد چالماز، سنسیز بیر آن آذربایجان
خوش گونلرین گتمیز مدام خیالیمدان، آذربایجان
وطن عشقی مکتبینده جان وئرمه یی اؤیره نمیشیک
استادیمیز دئییب هئچدیر وطن سیز جان، آذربایجان
بوتون دونیا بیلیر سنین عزتینله، قدرتینله
آباد اولوب، آزاد اولوب ملک ایران، آذربایجان
بیستون انقلابدا، شیرین وطن اوچون فرهاد
کولونگ چالمیش اؤز باشینا، زامان - زامان آذربایجان
یارب! ندیر بیر بو قده ر اورکلری قان ائتدیین
قولو باغلی قالاجاقدیر نه واختاجان آذربایجان
ائولادلاری نه واختاجان ترک وطن اولاجاقدیر
آیاغا دور، عصیان ائیله، اویان - اویان آذربایجان
بسدیر فراق اودلاریندان کول اله ندی باشیمیزا
قالخ آیاغا، یا آزاد اول یا تامام یان آذربایجان
شهریارین" اوره یی ده سنینکی تک یارالی دیر"
آزادلیق دیر منه مرحم، سنه درمان آذربایجان
محمد حسین شهریار